Pamilya Parreño sa San Enrique, ginproseso na ang pagpabalik sang bangkay sang anay barangay kagawad nga isa sa mga napatay sa Laguna shootout

San Enrique, Iloilo–Gina-proseso na sang pamilya Parreño nga mapauli sa Barangay Dacal, San Enrique ang bangkay ni anay barangay kagawad Simplicio Parreño, isa lima ka suspected kidnappers nga napatay sa shootout sa San Pablo City, Laguna sang Abril 10.

Suno kay Mrs. Dolor Parreño-Faldas, magulang sang napatay, ginaproseso sang ila utod sa Manila ang pagpabalik sang bangkay sa San Enrique bangud ini ang hingyo sang ila amay. Ginpahayag ni Faldas nga tatlo ka tuig na nga wala nakapauli sa ila si Simplicio kag wala man sila nakahibalo kon diin ini nagatenir tubtob nabalitaan na lang nga isa siya sa mga napatay sa Laguna shootout.

Wala man sang ideya si Faldas nga may grupo ang iya utod.

Antes nagbiya sa ila barangay, nagabiyahe si Simplicio sang tricycle sa San Enrique kag Passi City suno sa iya utod.

Una na ginhambal ni Dacal Punong Barangay Ariel Lasap nga gindeklarar nga absent without official leave ukon AWOL si Simplicio bangud wala nagatambung sa ila session. (AGB)