Pribado nga salakyan, gintiro sa circumferential road sa Oton; Driver kag tatlo ka sakay, nakaluwas

Oton, Iloilo–Gintiro ang pribado nga salakyan sa circumferential road nga sakup sang Brgy. Pakiad, Oton mga alas 3:30 kaina sang kaagahon.

Suno kay Inspector Danilo Noca, Deputy Chief of Police sang Oton Police Station, halin sa Smallville Complex, Mandurriao ang Toyota Vios nga duag grey sakay ang driver nga lalaki kag apat ka babaye. Apang tatlo ka babaye kag ang driver na lang ang sakay sang natabu ang pagpangtiro suno kay Noca bangud nadul-ong na sa Sooc, Arevalo ang isa ka sakay nga babaye.

Sa imbestigasyon sang Oton police, gintupungan sang isa ka pribado nga salakyan nga duag grey ang Toyota Vios kag ginhambalan ang driver nga magdulog. Ginpahayag nga nagdulog ang Toyota Vios samtang nagpanaug naman ang driver sang pribado nga salakyan kag nagkasa sang pusil suno kay Noca.

Madasig nga nagpaburhot ang driver sang Vios pero gintiro ini sang makapila ka beses. Narecover sa lugar ang pito ka baseyo sang ginapatihan 45 kalibre nga pusil.

Wala sang may nasamaran sa insidente apang nangin dulaan ang mga sakay sang Vios. Nagpalagyo man ang mga suspects kasunod sang insidente. (AGB)