(UPDATE) Proclamation nga nagdeklarar sa Boracay sa state of calamity, ginpirmahan na ni Presidente Rodrigo Duterte suno kay DILG OIC Eduardo Año

Boracay Island–Ginpirmahan na ni Presidente Rodrigo Duterte ang proclamation nga nagadeklarar sa Boracay sa state of calamity sa pagsugod sang anum ka bulan nga rehabilitasyon subong nga adlaw.

Gin-confirmar ini ni DILG OIC Eduardo Año sa press briefing sa Boracay kaina sang hapon. Suno kay Año, ginpirmahan ni Duterte ang rekomendasyon sang National Disaster Risk Reduction and Management Council nga state of calamity declaration sa Barangay Balabag, Barangay Manoc-Manoc kag Barangay Yapak sa sikat nga isla.

Kasunod sang deklarasyon, mahimo na magamit sang gobyerno ang duha ka bilyon ka pesos nga pondo agud ibulig sa mga apektado nga trabahador kag masuguran naman ang pagrehabilitate sang Boracay.

Ginpahanumdom naman ni PNP Chief Director General Oscar Albayalde ang mga pulis nga gindeploy sa Boracay nga sundon ang laye sa pagbantay sa seguridad sang isla.

Ginlaygayan niya man ang mga ini nga indi magbaton sang pabor bisan tanyagan sang mga resort owners agud indi mamalisyahan ang ila presensya. Tiun man suno kay Albayalde nga ipakita sang mga pulis ang disiplina kag pagsakripisyo.

Nag-abot man kaina sa Boracay si Albayalde kag naglibot sa  isla kaupod kay PRO 6 Director PCSUPT Cesar Hawthorne Binag. (AGB)