Maasin Mayor Mariano Malones, ginpablotter si Vice Mayor Francis Amboy bangud sa ginpahayag tuyo nga pagsaruso sa iya; Amboy, nag-athag nga luyag lang ma-istorya ang alkalde

Maasin, Iloilo–Ginpa-blotter ni Mayor Mariano Malones si Vice Mayor Francis Amboy bangud sa ginpahayag tuyo nga pagsaruso sa iya sa flag ceremony sang Abril 30.

Ginpahayag ni Malones nga naakig si Amboy sa kaundan sang iya mensahe gani nagahuro-huro ini palapit sa podium kag tuyo nga pauntaton siya sa paghambal apang ginpunggan ini sang iya asawa. Suno kay Malones, ginbasa niya lang sa atubang sang mga empleyado ang pahayag sang municipal engineer nga nagapanghiwala sa akusasyon ni Amboy nga ginpahog sang alkalde ang engineer. Suno pa kay Malones, una na nag-privilege speech sa Sangguniang Bayan si Amboy gani siya naman ang mahambal.

Pagkatapos sang mensahe ni Malones, ginpahayag nga liwat siya gintuyo nga palapitan ni Amboy apang ginpunggan ini sang mga pulis kag iban nga empleyado.

Nagsugod suno sa iya ang issue sa tunga nila ni Amboy sang ginkuwestyun niya ang mga proyekto nga gin-kontrata sang bise alkalde nga indi maayo ang pag-obra.

Suno naman kay Amboy, luyag niya lang ma-istorya ang alkalde agud nga mag-athaganay sila sa mga isyu.

Gin-ako ni Amboy nga ginhambalan niya si Malones nga mag-untat sang naghambal ini may kaangtanan sa pulitika. Gin-ako man ni Amboy nga nagprivilege speech siya nga indi pagamiton ang flag ceremony agud banatan ang kasumpong sa pulitika. (AGB)