Ilonggo OFW nga nagatrabaho bilang accountant sa Saudi Arabia, pagapasindunggan sang Bagong Bayani Award for Community Service

Saudi Arabia — Natalana pasidunggan ni Presidente Rodrigo Duterte ang Ilonggo OFW nga nagatrabaho bilang accountant sa Saudi Arabia bangud sa iya pagserbisyo sa komunidad.

Ginkunfirma ni Mr. Florante Catanus, tumandok sang Brgy. Democracia, Jaro, nga natalana siya pasidunggan sang Bagong Bayani Award for Community Service sang presidente sa Hunyo 7 sa PICC.

Sa sulod sang halos 26 ka tuig nga pag-obra sa Saudi, natukod ni Catanus ang Eastern Lawn Tennis Association para sa mga OFW sa lugar tubtob nga nagdako kag ginbuksan man para sa iban nga nationalities.  Gintukod man ni Catanos ang Ilonggo Group nga Pinasahi. Ang amo nga grupo suno kay Catanus ang nagapatigayon sang pinakadako nga Filipino Community Day sa Saudi.

Dugang diri, nagahimo man ang ila grupo sang mga medical-dental missions, nagaconduct sang labor seminars, OWWA seminars kag iban pa.  Si Catanus ang nag-eskwela sa Jaro Elementary School. Nagraduwar man siya bilang valedictorian sa Jaro National High School kag cum laude sa Colegio de Sa Jose sa kurso nga Commerce major in Accounting. (JoMaque)