LINIBO KA TRABAHO, NAGAHULAT SA JOB EXPO SA HUNYO 1
Iloilo City – 35,000 ka job vacancies kag job orders para sa local kag overseas employment ang nagahulat sa mga job seekers sa hiwaton nga Job Expo sang Iloilo Provincial Government sa Hunyo 1.
Suno kay Mr. Francisco Heller, head sang Public Employment Service Office (PESO-Iloilo Province), 159 ka mga kompaniya ang kumpirmado nga mapasakup sa Job Expo nga ginabug-usan sang 129 para sa local employment kag 30 para sa overseas employment.
May gin-organize man nga Libre Sakay ang provincial government sa bulig sang mga local chief executives sang 16 ka banwa sa probinsya agud mag-transport sang mga job seekers pakadtu sa kapitolyo.
Ginabug-usan ini sang Alimodian, Anilao, Barotac Viejo, Barotac Nuevo, Cabatuan, Concepcion, Igbaras, Janiuay, Lambunao, Leon, Maasin, Miagao, San Miguel, Sta. Barbara, Tubungan kag Zarraga.
Base sa record sang PESO-Iloilo Province, may 853 na ka mga aplikante ang nagpre-register para sa Job Expo.
Ginkumpirmar man ni Heller ang pag-abot ni Department of Labor and Employment (DOLE) Secretary Silvestre Bello III sa Job Expo. (JoMaque)