Tatlo ka lalaki nga natulugan sa kahulugbon,ginpanglabu patay sa Nueva Valencia, Guimaras; suspetsado, nadakpan

Nueva Valencia, Guimaras — Patay sa pagpanglabu ang tatlo ka lalaki sa Barangay Guiwanon, Nueva Valencia, Guimaras.

Ginkilala ang mga napatay kanday Jophe Umilig, 34, nga may pilas sa ulo kag liog; Ignacio Dela Cruz Jr, 36, nga may pilas sa ulo kag likod; kag Elvic Vera Cruz,25, nga may pilas sa likod kag malapit sa liog.  Gindala pa ang tatlo sa Nueva Valencia District Hospital apang gindeklarar nga dead-on-arrival.

Nadakpan sa hot pursuit operation ang suspek nga si Sentil June Gamilla, 19 anyos.

Sa imbestigasyon ni Chief Inspector Ahlie Estember, hepe sang Nueva Valencia Police Station, upod man nga nag-inom ang mga biktima kag suspek sang Mayo 31 sang gab-i. Ginsugo si Gamilla nga magbakal sang ilimnon apang nadugayan ini nga magbalik gani gin-akigan sang tatlo.

Posible suno kay Estember nga nagdumot ang suspek gani nagpauli ini kag nagkuha sang binangon. Ginbalikan sini ang tatlo nga natulugan sa kahulugbon kag ginpanglabu.

Ang island barangay sang Guiwanon ang pinakamalayo nga barangay sa Guimaras nga 30 tubtob 45 minutos ang biyahe halin sa Cabalagnan Wharf sa Nueva Valencia mainland. Ginpasakaan na sang tatlo ka counts sang murder ang 19 anyos nga suspek. (JoMaque)