(UPDATE) Asawa sang gintudlo nga secretary sang Central Front Committee sang KR-Panay, nakaguwa na sa prisuhan matapos nagpiyansa

Iloilo City–Nakaguwa na sa presuhan si Maria Theresa Cabales, asawa sang gintudlo nga secretary sang Central Front Committee sang Kilusang Rehiyon-Panay (KR-P) nga gindakup bangud may warrant of arrest sa kaso nga rebellion.

Gin-confirmar ni Mr. Reylan Vergara sang Bayan Panay ang pagrelease kay Cabales alas-6 kagab-i matapos nagpiyansa sang P40,000. Si Cabales ang gindakup sa Tanza Timawa, City Proper kahapon.

Suno kay Vergara, harassment lang ang ginahimo sang gobyerno ni Presidente Rodrigo Duterte kay Cabales. Ginpahayag man sini nga kon rebellion ang kaso, dapat kuntani nga indi makapiyansa si Cabales.

Gintawag ni Vergara nga kabutigan ang pahayag ni Police Regional Office 6 Director PCSUPT. John Bulalacao nga may kaso pa nga murder si Cabales. Ginkondenar sini ang suno sa iya, pag-convict sa mga ginadakup sang PNP paagi sa publicity bangud gilayon sila nga ginapresentar sa media.

Nagapangita sang ebidensya ang grupo suno kay Vergara agud pamatud-an nga indi miembro sang mga rebelde si Cabales. (AGB)