Minimum wage hike sa Western Visayas, gin-aprubahan sang Regional Tripartite Wages and Productivity Board

Gin-aprubahan sang Regional Tripartite Wages and Productivity Board ang pagpasaka sang minimum wage sa mga nagatrabaho sa pribado nga sektor sa Western Visayas.

Gin-confirmar ni Mr. Wennie Sancho, secretary general sang General Alliance of Workers Association nga isa sa duha ka labor representatives sa RTWPB, nga gin-aprubahan nila ang 365 pesos nga minimum wage sa rehiyon para sa mga nagatrabaho sa non-agriculture industrial kag commercial establishments nga may masobra 10 ka empleyado.

Halin sa minimum wage subong nga 323 pesos kag 50 sentimos, gindugangan ini sang RTWPB sang 26 pesos kag 50 sentimos kag 15 pesos nga cost of living allowance ukon COLA ukon 41 pesos kag 50 sentimos sa kabug-usan.

Magasaka man ang minimum wage sang mga empleyado sa mga pribado nga kompaniya nga may 10 panubo nga numero sang mga nagatrabaho. Suno kay Sancho, mahimo na nga 295 pesos ang sweldo sa mga kompaniya nga naga-employ sang 10 ka workers panubo halin sa 271 pesos kag 50 sentimos.

Nagdesisyon man ang RTWPB nga himuon man nga 295 pesos ang minimum wage sang agriculture sector para sa mga plantation kag non-platation workers halin sa 281 pesos.

Ipadala ang order sa National Wages and Productivity Commission kag kon ma-publish na, mahimo i-implementar ang bag-o nga minimum wage sa Agosto subong nga tuig. (AGB)