Bana, ginlabu ang iya asawa kag duha pa ka iban bangud sa pagpangimon; Bana, naghikog man paagi sa pagtiro sa iya kaugalingon
Janiuay, Iloilo — Ginlabu sang bana ang iya asawa kag duha pa ka iban sa Barangay Abangay, Janiuay pasado las nuebe sang Hunyo 29 sang gab-i.
Una nga ginlabu ni Wilmer Brasileño ang iya asawa nga si Edna kag ginsunod sini nga pinanglabu sanday Jonel Cartolina kag Joan Almirante.
Antes ang pagpanglabu, ginpahayag nga nagdala sang ilimnon sa balay sang mag-asawa nga Brasileño si Cartolina. Pero ang mag-asawa kag si Almirante lang ang nag-inom. Natulugan sa balay sang mga Brasileno sanday Cartolina kag Almirante.
Sang nahubog na, ginpahayag nagwaras si Wilmer kag nagsinggitan nga “sobra na ni,” nagkuha sang binangon kag una nga ginlabu ang iya asawa. Napilasan ini sa wala nga portion sang iya ulo. Nakasinggit si Edna kabangdanan nakabugtaw man sanday Cartolina kag Almirante.
Nalabuan man ni Wilmer si Cartolina sa likod nga parte sang iya dulunggan, dughan kag siku. Nakibyasan naman si Almirante.
Matapos ang pagpanglabu, nagkuha si Wilmer sang kalibre 38 nga pusil kag nabatian pa ini naghambal nga “wala pulos nga kabuhi na ini” antes nagtiro sang kaugalingon nga nagresulta sa iya kamatayon. Suno sa pamilya posible nagpati si Wilmer nga napatay sini ang asawa kabangdanan nagpaminsar ini nga mag-suicide.
Pagpangimon ang ginalantaw nga motibo sang mga police. (JoMaque)