Bag-o nga fare matrix para sa dugang nga pletehan sa depasahero nga mga jeep, wala pa naisyu sang LTFRB suno sa transport group ICLAJODA

Iloilo City–Wala gihapon naka-issue sang bag-o nga fare matrix ang land transportation franchising and regulatory board ukon LTFRB central office para sa ipatuman nga fare increase sa mga depasahero nga jeep sa syudad sang Iloilo.

Suno kay Iloilo City Loop Alliance of Jeepney Owners and Drivers Association ukon ICLAJODA President Raymundo ‘Boyet’ Parcon, posible subong nga semana magapaguwa sang bag-o nga kopya sang fare matrix ang ahensya.

Gin-athag ni Parcon nga original copy kag indi photocopy sang fare matrix ang puwede mapatapik sa kada depasahero nga jeep.

Malapit duha ka semana na ang nakaligad sang gin-aprobahan sang LTFRB ang petition sang ICLAJODA nga himuon nga P9.00 halin sa P6.50 ang regular nga pamasahe sa jeep samtang may 20% discount para sa mga estudyante, senior citizens kag persons with disabilities. (AGB)