Love triangle, isa sa mga motibo nga ginasunod sang pulis sa pagtiro-patay sa security guard sa Molo

Iloilo City — Love triangle ang isa sa mga motibo nga ginasunod sang Molo police sa pagtiro patay sa security guard sa Calumpang sang Hulyo 2 sang gab-i.

Pahayag ini ni Chief Inspector Marlon Valencia, hepe sang Molo Police Station, matapos nakita sa cellphone sang biktima nga si Jeovy Puzon, 33 anyos sang Baje, Leon apang naga-board sa Tanza Baybay, City Proper, ang text messages nga nagahagad sa guwardya nga mag-apas sa Aida’s Lechon sa Calumpang agud maka-updanay sila. Nabutang man sa text message nga nahidlaw na ang nagapadala sang mga mensahe sa biktima.

Posible suno kay Valencia nga gin-ila ang biktima kag nagpakuno-kuno nga babaye ang naga-text apang pag-abot sa lugar, gintiro ini sang suspek. Magluwas sa text messages, may CCTV footage man nga nakuha ang police kag ginalauman nga makabulig sa imbestigasyon agud makilala ang suspek.

Base sa imbestigasyon, naglisensya si Puzon sa iya gina-obrahan sa Robinson’s Place sa City Proper nga kadtuan lang ang iya asawa gani wala nakaduty. (JoMaque)