Anay Congressman Junjun Tupas, maga-apelar sa ginfile batuk sa iya nga graft kag malversation
Maga-apelar si former 5th District Congressman Niel ‘junjun’ Tupas Jr angut sa gin-file nga kaso batuk sa iya sa Sandiganbayan.
May kaangtanan ini sa alleged misuse sang P4.85 million nga pork barrel fund sa mga ghost projects sang 2008. Sigurado ang anay kongresista nga kon mapa-idalum siya sa preliminary investigation kag makasabat sa kaso, matukiban nga wala sang basehan ang mga akusasyon batuk sa iya.
Ginpanindugan ni Tupas nga wala siya napahibalo sang Ombudsman sa kaso gani wala niya nadepensahan ang iya kaugalingon sa preliminary investigation. Dugang sini, siya pa ang nagreport sa Commission on Audit sang natukiban nga ginagamit ang iya ngalan sa pag-release sang kuwarta sang gobierno.
Gin-akusahan sang Ombudsman prosecutors si Tupas nga nag-endorso sang Kabuhayan at Kalusugan Alay sa Masa Foundation Inc. nga ginpahayag unaccredited kag unqualified agud magpatuman sang livelihood projects nga ginpunduhan sang iya PDAF.
Si Tupas ang nagapangatubang sang two counts sang graft kag tag-sa ka count sang malversation kag malversation through falsification of public documents. (AGB)