Dingle Mayor Jessie Alecto, nagresign!

Iloilo City — Nagresign sa puwesto si Dingle mayor Jessie Alecto. Ini ang ginkumpirmar ni Governor Arthur Defensor matapos nabaton ang resignation letter ni Alecto. Sa iya nga resignation letter, wala nabutang sang alkalde ang rason sang iya pagresign.

Nag-umpisa sang Hulyo 1 ang resignation sang alkalde kag nabaton sang opisina ni Defensor kahapon.

May posibilidad suno kay Defensor nga may ginhisugtan sanday Mayor Alecto kag Vice Mayor Rufino Palabrica III. Natapos na ang termino ni Palabrica bilang mayor sang 2016 kag iya ginpadalagan sa pagka-mayor ang iya vice mayor sadtu nga si Alecto kag ginpahayag nahisugtan nga maresign ini antes ang 2019 elections suno sa gobernador.

May impormasyon man nga nabaton si Defensor nga nagresign si Alecto bangud mapadulong ini sa Estados Unidos.

Sanday Alecto kag Palabrica ang yara sa idalum sang Abyan Ilonggo Regional Party ni 4th District Cong. Ferj Biron. (JoMaque)