Padayon nga illegal drug transaction sang 2 ka preso sa City District jail-Male Dormitory sa Ungka, Jaro, imbestigaran sang BJMP 6

Iloilo City — Imbestigaran ni Jail Supt. Larry Fuentes, warden sang City District Jail-Male Dormitory sa Ungka, kon paano nakasulod ang cellphone sa jail facility.

Nangayo sang bulig si Fuentes sa BJMP regional office agud maghimo sang separado nga imbestigasyon matapos ginsurrender sang inmate nga si George Barcebas ang cellphone.  Kasunod man ini sang pagpahibalo sang Aksyon Radyo kay Fuentes sa ginbuyagyag nanday Boshein George Castillo kag Careolo De Guzman nga nadakpan sa buy bust operation sa Sto. Niño Norte, Arevalo nga preso sa BJMP Ungka ang ila ka-transaksyon sa illegal drug trade.

Si Fuentes ang bag-o lang nga gin-assign sa City District Jail-Male Dormitory-Ungka.

Ipatuman naman subong nga adlaw ni Fuentes ang ‘NO BAG POLICY’ sa mga bisita agud indi makalusot ang mga kontrabando. Mabutang man sang metal detector sa jail facility. (JoMaque)