Term sharing, posible nahisugtan sang nagresign nga si Dingle Mayor Jessie Alecto kag Vice Mayor Rufino Palabrica III suno kay Governor Arthur Defensor; Palabrica, nanginwala nga na-istoryahan nila ni Alector ang power sharing

Iloilo–May posibilidad nga may nahisugtan sanday resigned Mayor Jessie Alecto kag Vice Mayor Rufino Palabrica III angut sa term sharing.

Base sa nabatian ni Governor Arthur Defensor, sang 2016, ginpadalagan ni Palabrica nga mayor si Alecto nga vice mayor siya bangud tapos na ang iya termino.  Sa nabatian sang gobernador, naghisugot sanday Alecto kag Palabrica nga maresign si Alecto pagkatapos sang anum ka bulan apang wala natabu bangud sang gin-file nga kaso sa Ombudsman kay Palabrica.

Na-dismiss si Palabrica pila ka bulan pagkatapos sang eleksyon sang 2016 kag subong nga tuig lang gin-reinstate matapos ginbaliskad sang Court of Appeals ang dismissal order sang Ombudsman.

Nanginwala naman si Palabrica nga na-istoryahan nila ni Alecto ang term sharing.

Hunyo subong nga tuig sang nagpungko nga acting Mayor si Palabrica bangud nagfile sang leave of absence si Alecto samtang nagaproseso sang iya visa pakadto sa US. Sa pagkahibalo ni Palabrica, na-aprubahan ang visa apang wala siya sang ideya kon magasaylo na si Alecto sa Estados Unidos. (AGB)