BJMP 6, nagapati nga naga-communicate gihapon ang pila ka mga preso sa Iloilo City District Jail-Male Dorm sa Ungka, Jaro sa mga personalities sa guwa sang jail facility
Jaro, Iloilo — Nagapati ang tagdumalahan sang Bureau of Jail Management and Penology ukon BJMP VI nga padayon ang pag-communicate sang mga preso sa Iloilo City District Jail – Male Dormitory sa Brgy. Ungka sa mga personalities sa guwa sang jail facility.
Ini matapos narecover sa greyhound operation sa jail facility kaina sang kaagahon ang sim card, mga saksakan, kable sang kuryente kag iban pa.
Suno kay SJO3 Leo Laserna, chief sang investigation and prosecution division sang BJMP VI, imbestigaran nila ang natungdan nga mga preso sa diin nakuha ang mga kontrabando.
Una na ginsurrender sang duha ka preso sa ICDJ-MD ang ila sim card kag cellphone matapos gintudlo sang duha ka drug suspects sa Arevalo nga katransaksyon nila sa illegal drug trade.
Nagapadayon ang imbestigasyon sang BJMP VI kun paano nakasulod ang mga kontrabando kag kun may kaangtanan diri ang mga personnel sang amo nga jail facility. (JoMaque)