Isyu kon nakaagi sa public consultation ang pagpatindog sang pantalan sang La Filipina Uy Gongco sa Ingore, Lapaz, wala nadiskusyunan sang maayo sa konseho suno kay Councilor Plaridel Nava

Iloilo City–Wala nadiskusyunan sang maayo sa City Council kon nakahiwat sang public consultation ang La Filipina Uy Gongco angut sa ila ginpatindog nga pantalan sa Barangay Ingore, Lapaz.

Ini ang madumduman ni Councilor Plaridel Nava sang gin-aprubahan sang konseho sang 2014 ang resolution of no objection para sa application sang miscellaneous lease agreement ukon MLA sang La Filipina Uy Gongco sa Department of Environment and Natural Resources.

Indi man maathag sa iya kun ngaa gin-endorse sang konseho ang MLA application sang kompaniya sa DENR kag kun ginrequire nila ang kompaniya nga magsumiter sang dokumento nga makapamatuod nga naghiwat ini sang public consultation.

Nagrequest na si Nava sang minutes sang session agud mahibaluan kon sin-o ang proponent sang resolution, ano ang gindiskusyunan kag paanu ginpasulod sa agenda.

Magluwas nga wala nag-agi sa konsultasyon, ginareklamo man sang mga residente nga istorbo sa ila katulugon ang paglabay sang mga truck nga nagakarga sang mga agriculture products halin sa pantalan pakadtu sa bodega sang La Filipina Uy Gongco.

Indi naman makabig nga daan nga isyu ang pagpatindog sang pantalan suno kay Nava.

Suno kay Nava, magluwas nga illegal, makahalalit ang ginahimo sang kompaniya sa mga pumuluyo sa barangay bangud nagatuga sang gahod ang paglabay sang mga trucks kon tungang gab-i tubtub kaagahon. (AGB)