36 anyos nga lalaki sa Lapaz, ginpapreso sang iya live-in partner matapos siya ginhaboy sang balde

Lapaz, Iloilo City – Nagahilibiun ang 28 anyos nga waitress nga tumandok sang Capiz matapos ginhaboy sang plastic nga balde sang iya nakainom nga live-in partner gani iya ginpapreso kagab-i, Hulyo 20.

Suno kay PO2 Edna Magbanua sang Women and Children’s Protection Desk, base sa panaysayon sang babaye, halin siya sa trabaho sang pagsulod sa pwertahan sang ila boarding house, ginhaboy siya sang balde sang iya live-in partner kag naigo gid siya sa tiyan. Antes sini, may impormasyon man nga masami nga ginasakit sang lalaki ang babaye.

Ginpapreso sang babaye ang iya live-in partner agud makapanghimos siya kag makapauli sa Capiz. Wala sang plano nga magpasaka sang kaso sa iya live-in partner ang waitress suno kay PO2 Magbanua.

Nakaguwa kaina sang aga, Hulyo 21, ang lalaki matapos nag-expire ang iya detention period. Naghinulsol ini suno sa pulis pero wala na naabtan sa ila boarding house ang iya live-in partner.

Ang lalaki suno kay PO2 Magbanua, may bata sa iya una nga asawa. Nakaagi man ini nga ginreklamo sang iya una nga asawa nga mapintas. Wala sang trabaho ang lalaki. | (JoMaque)