Presidente Rodrigo Duterte, nagdeliver sang iya ikatatlo nga SONA

Batasan Pambansa— “The war against illegal drugs is far from over.”

Ini ang pauna nga mensahe ni Presidente Rodrigo Duterte sa iya ikatatlo nga State of the Nation Address (SONA) kaina sang hapon, Hulyo 23.

Ginpahayag ni Duterte nga indi pwede nga mapahigad ang giyera kontra droga kag ang “relentless and chilling” nga mga operasyon sa pagpadayon sang kampanya. Nakahibalo suno sa presidente ang mga involved sa illegal drugs sang mga konsekwensya sang ila ginahimo.

Ginbanatan pa ni Duterte ang mga human rights activists kag gintawag ang ila aksyon nga “misdirected.” Dugang ni Duterte, “your concern is human rights, mine is human lives” nga ginpalakpakan sang mga nagatambung sa SONA.

Na-delay sang masobra isa ka oras ang speech sang presidente matapos nga ginkakas sang mayorya sa Kamara si Speaker Pantaleon Alvarez kag ginpili nga magabulos si anay Presidente kag subong Pampanga 2nd District Rep. Gloria Arroyo.

Imbes alas-4, nagsugod ang speech ni Duterte alas-5:21 sa hapon kag natapos alas-6:09 sa gab-i. Base sa impormasyon nga ginpadala ni Special Assistant to the President Christopher “Bong” Go sa mga katapo sang media, isa-isa nga gin-istorya ni Duterte sanday Alvarez kag Arroyo.

Si Alvarez ang nag-preside sa joint session sang 17th Congress samtang wala nakita si Arroyo sa Plenary Hall samtang naga-speech ang presidente. (AGB)