PRESO SA BJMP-UNGKA, JARO, NAGTUYO MAG-SUICIDE
Iloilo City–Nagtuyo magpanginmatay ang detainee sa Bureau of Jail Management and Penology (BJMP)-Ungka sa Jaro paagi sa paggurot sang iya pulso gamit ang improvised nga kutsilyo.
Natabu ini las 2:55 sang hapon sang Hulyo 22.
Suno kay JSupt Larry Fuentes, Jailwarden sa BJMP-Ungka, nagbisita ang amay ni alyas Toto, 29-anyos kahapon sang natabu ang tuyo sini nga pagpanginmatay.
Naglisensiya ang preso nga makadto sa comfort room pero nakit-an na lang ini sang ulhi nga dugu-on na.
Yara na sa estable nga kundisyon si Toto.
Si Toto ang may kaso may kaangtanan sa illegal nga druga. (JoMaque)