Poder nga maka-supervise sa police, indi pa mabalik sa tatlo ka ginpahayag narco mayors sa probinsya suno sa Napolcom 6

Iloilo City — Indi pa mabalik sa tatlo ka mayors sa probinsya nga nalakip sa narco list ni Presidente Rodrigo Duterte ang poder nga maka-supervise sa ila police.

Suno kay National Police Commission 6 Director Atty. Joseph Celis, mabalik lang ang deputation nanday Calinog Mayor Alex Centena, Carles Mayor Sigfredo Betita kag Maasin Mayor Mariano Malones kon ma-clear ang ila pangalan base sa validation process sang PDEA, PNP, Intelligence Service of the Armed Forces of the Philippines kag National Intelligence Coordinating Agency kag kay Presidente Duterte.

Ginkakasan sang police power ang mga alkalde upod sa iban pa nga local chief executives matapos nga ginlawag ni Duterte nga ginpahayag drug protectors. Lunsay naman nanghiwala ang tatlo nga involved sila sa illegal drugs. (JoMaque)