December 1, 2021

3 ka kandidato sa pagka-Liga president sa Iloilo City, nagplastar sang ila mga plano kon magdaug

Read Time:2 Minute, 15 Second

Iloilo City–Lunsay nagplastar sang ila plano sa konseho bilang tiglawas sang mga barangay ang tatlo ka mga nagakandidato sa pagkapresidente sang liga nga sanday San Juan, Molo Punong Barangay Sipil Espinosa, President Roxas city proper Punong Barangay Irene Ong kag Jalandoni Estate, Lapuz Punong Barangay Efren Gimeo.

Bisita ang tatlo sa Aksyon Hotline program sang Aksyon Radyo Iloilo subong nga Sabado, Hulyo 28.

Suno kay Espinosa, i-emphasize niya nga dapat pareho ang pagtratar sa tanan nga kapitan kag gusto niya nga kun ano ang impormasyon halin sa mga ahensiya nga naga-concern sang barangay dapat nga gilayon ini ipahibalo sa mga kapitan. Dapat man suno sa iya nga transparent ang tanan ilabe na sa status sang pondo sang liga kag kun diin nagakadto ang kuwarta.

Sa iya naman bahin, ginpahayag ni kapitan Ong nga isa sa mga plano niya ang magbutang sang abogado sa opisina sang liga agud mapamangkutan sang mga kapitan nga libre kun may mga legal concerns.// ginpabugal nga ong nga siya ang author sang death benefits sa mga kapitan.

Si kapitan Gimeo naman, nagpabutyag nga may mga naplastar siya nga plano agud makabulig patuman sang mga programa sang national government.

SUPORTADO SANG MGA PULITIKO?

Wala direkta nga nag-ako ang tatlo nga suportado sila sang mga dalagku nga pulitiko.

Lunsay ginpahayag nanday Espinosa, Ong kag Gimeo nga non-partisan ang barangay kag wala sila nagasalig sa mga pulitiko.

Pero suno kay kapitan Gimeo, nahibaluan sang tanan nga suportado si Espinosa sang iya pakaisa nga si Mayor Joe Espinosa samtang si Ong naman ang ginasuportahan ni congressman Jerry Trenas.

Lahog naman nga ginsabat ini ni Ong nga si Gimeo ginasuportahan sang mas daku pa gid nga opisyal.

Gintumod ni ong si President Rodrigo Duterte nga amo ang yara sa likod ni Gimeo.

AWAY KONTRA DRUGA

Mangin prayoridad ang away kontra sa druga sang tatlo ka nagakandidato sa pagka-liga president sa siyudad kun mahatagan sila sang tsansa nga magdaug.

Kun sadto suno sa ila natahap ang mga kapitan sa kampanya, subong ila ginpasiguro nga mangin aktibo ang ila pagkampanya kontra druga.

ANO ANG ILA NALABAWAN?

Sa pamangkot naman kun ano ang ila nalabawan sa ila kontra, ginpahayag ni kapitan Gimeo nga edge niya ang direkta nga access sa presidente.

Si kapitan Espinosa naman nagpahayag nga may edge siya bangud pakaisa niya ang nagapungko nga mayor, mas mahapos suno sa iya ang pag-approach sa alkalde.

Suno naman kay Ong, pierde siya sa duha bangud si Espinosa may pakaisa nga mayor samtang si Gimeo, may presidente nga ginasaligan pero ang nalabawan niya sa duha amo nga “tatay kag nanay” siya.

Sa Lunes, Hulyo 30, natalana ang eleksyon sa liga. Mangin ex-officio councilor ang magadaug sa liga elections. (AGB)

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Previous post Kaso ni New Lucena Mayor Christian Sorongon batuk kay 2nd District BM Liezl Seville kag bana sini, gindismiss
Next post (UPDATE) Panday nga gintiro sa Oton, napatay samtang ginabulong sa ospital