Transport group ICLAJODA, indi pabor nga i-accredit sang syudad ang mga barkers kag parking attendant

Iloilo City–Indi pabor ang Iloilo City Loop Alliance of Jeepney Owners and Drivers Association ukon ICLAJODA sa plano ni Public Safety and Transportation Management Office head Jeck Conlu nga i-accredit ang mga barkers kag parking attendants ukon mga ‘atras boys.’

Suno kay ICLAJODA President Raymundo ‘Boyet’ Parcon, ang ila grupo ang nagduso sadtu paagi kay Councilor Plaridel Nava nga magdihon sang Anti-Barker Ordinance bangud sa reklamo sang mga drivers nga nagapugok ang trapiko.

Ginbasehan man nila sa pagduso sang ordinansa amu ang kita sang mga barkers nga mas daku pa sang sa ginakita sang mga drivers.

Natukiban man ni Parcon nga may partida ang mga traffic aides sa ginakita sang mga barkers.

Nalipay na kuntani ang mga drivers suno kay Parcon nga nadula ang mga barkers bangud sang Anti-Barker Ordinance apang nagbalik naman kag labi pa nga nagdamu. (AGB)