(UPDATE) 6 sa 7 ka miembro sang NPA nga napatay sa engkwentro sa Antique, nakilala na
San Jose, Antique–Nakilala na ang anum sa pito ka mga napatay nga miembro sang New People’s Army sa Brgy. Atabay kaina sang kaagahon, Agosto 15.
Ginkilala sang mga otoridad ang mga napatay kanday Jason Talibo Alias “Bebe” sang Indaluyon, Igbaras, 27 anyos kag identified finance officer sang Southern Front sang Kilusang Rehiyong Panay; Karen Ceralvo, 41 anyos sang Viscara Subdivision sa Kalibo, Aklan nga educational training staff kag miembro sang Regional Taxation Implementing Group; Felix Salditos, 60 anyos sang Ilog, Negros Occidental; Jason Sanchez, 28 anyos sang Igtuble, Tubungan nga assistant finance officer sang Southern Front Committee; Rene Yap, 60 anyos sang Poblacion, Leganes nga miembro man sang RTIG; Liezel Bandiola Alias Mayang sang Nabas, Aklan nga Cultural staff sang RTIG kag political officer sang Southern Front Committee kag isa pa ka wala nakilala nga lalaki.
Nakapalagyo naman si Joven Seralvo Alias ka Lex nga subject sang warrant of arrest upod kay Sanchez sa kaso nga frustrated murder.
Suno kay Barangay Kagawad Ronaldo Villanueva, wala siya sang ideya sa presensya sang mga rebelde sa ila lugar kag wala man sini nanotisyahan nga may makaduluda nga hulag sa ila kamalig kag abandonado nga simbahan nga ginateniran sang mga napatay.
Nagkalain-lain nga mga kalibre sang pusil, eksplosibo, gadgets, motorsiklo kag kuwarta ang narecover sa kamalig nga ginatineran sang mga rebelde.
Narecover man ang mga personnal IDs; extortion letters nga may letter head sang Napoleon Tumagtang Command-Southern Front Panay; personal notebooks; listahan sang mga kompaniya, bank books, ATM cards, white envelopes, mga bulong kag walo ka backpacks.
‘Masaker’
Gintawag naman sang NPA nga masaker ang natabu. Suno kay Ka Julio Montana, spokesperson sang Coronacion Chiva Waling-Waling Command sang NPA-Panay, indi armado ang grupo sang mga rebelde sa nasambit nga barangay.
Kon matalupangdan suno sa iya, wala sang patimaan nga may tiruhay nga natabu kag wala man sang patimaan nga nagbatu ang mga napatay kon basehan ang sitwasyon sang balay nga ginatineran sang mga rebelde.
Ginkuwestyun sini ang gilayon nga pag-cordon sa lugar kag pagdumili sa mga indi otorisado nga magsulod gani daku ang posibilidad nga planted ang mga pusil kag eksplosibo nga narecover.
Indi naman magkomento si Montana sa mga narecover mga extortion letters nga may letter head sang Napoleon Tumagtang Command-Southern Front Panay. Natalana suno sa iya nga magpaguwa sang statement ang Coronacion Chiva Waling-Waling Command kag Community Party Panay Region agud maklaruhan ang mga pumuluyo sa matuod nga natabu. (AGB)