BANGKAY SANG MGA NAGKALAMATAY SA SAN JOSE ANTIQUE, NA AUTOPSY NA; IGU SANG MGA BIKTIMA, LUNSAY PATAL SINO KAY DR. OWEN LIBAQUIN

Patal nga pilas ang naagum sang mga lima sa pito ka nagkalamatay sa engkwentro sa Barangay Atabay, San Jose Antque sang Agosto 15 sang kaagahon.

Ini base sa resulta sang autopsy nga ginconduct ni Dr. Owen Libaquin, medico-legal officer sang Police Regional Office 6.

Lima ang gin-autopsy sa pito ka mga napatay nga ginalakipan nanday Eldie Labinghisa sang Tagbak, Jaro nga may duha ka igu sa dughan; Peter Mecenas sang Culasi, Antique nga may duha ka igu sa ulo kag mata; Liezel Bandiola sang Nabas, Aklan nga may igu sa dughan, wala nga guya kag bati-is; Karen Cerlvo sang Nabas, Aklan nga may igu sa dughan; kag Felix Salditos sang Ilog, Negros Occidental nga may igu sa kilid kag naglapos sa dughan.

Nagasanto suno kay Libaquin ang ila igu sa bala sang M16.

Bag-o lang naka-kaon ang tatlo ka lalaki antes napatay.

Wala sang casualty sa mga police kag suldado nga nagserbe sang warrant of arrest.

Natapos sa engkwentro ang operasyon suno sa mga otoridad bangud ginhabuyan sila sang granada.