(UPDATE) Nadakpan nga barkers nga naglapas sa Anti-Barker Ordinance sa syudad, nadugangan sang duha; PSTMO Head Jeck Conlu, nagpangayo sang bulig sa mga transport groups para madakpan ang violators sang Anti-Barker Ordinance

Iloilo City–Nadugangan sang duha ang mga barkers nga nadakpan nga naglapas sa Anti-Barker Ordinance.

Pinakaulihi nga nadakpan kahapon, Agosto 17, sanday Marvin Denosta sang Zone 3 Bo. Obrero, Lapuz nga na-aresto nga nagapasaka sang pasahero sa Iznart Street, City Proper. Nakuha kay denosta ang Php 54.

Nadakpan man nga nagapanawag sang pasahero sa parking area sang Bitoon-Balibago, Jaro sa Rizal Street, Barangay Benedicto si Allen Aptinggo, 31 anyos sang Zone 2 Bitoon, Jaro. Nakuha kay Aptinggo ang Php 190 kag cellphone.

Una nga nadakpan sang Agosto 15 sanday Melver Junio sang Kauswagan, City Proper; Jeric Boris sang Rizal Pala-Pala, City Proper kag Dexter Pachejo sang Bolilao, Mandurriao.

Nagpangayo naman sang bulig si Public Safety and Transportation Management Office Head Jeck Conlu sa mga transport groups para sa pagdakup sa mga violators sang Anti-Barker Ordinance.

Suno kay conlu, puwede nga ma-citizen’s arrest ang mga barkers nga nagapanawag kag nagapasaka sang pasahero. (AGB)