Mayor Joe Espinosa kag PSTMO Head Jeck Conlu, plano pasakaan sang kaso sang transport group CLIAJODA kon indi maaksyonan ang ila mga reklamo

Iloilo City–Pasakaan sang kaso administratibo sa Ombudsman sang City Loop Integrated Alliance of Jeepney Operators and Drivers Association sanday Mayor Joe Espinosa kag Public Safety and Transportation Management Office Head Jeck Conlu kun indi nila pag-aksyonan ang ila reklamo sa implementasyon sang Perimeter Boundary Ordinance kag iban pa nga mga traffic laws sa sulod sang isa ka semana sugod subong nga adlaw.

Suno kay CLIAJODA secretary general Rizal Alido, sang nagligad nga tuig pa nila ginpalab-ot sa mga natungdan ang ila reklamo apang wala sa gihapon na-aksyonan.

May kahigayunan nga maresponder ang city government suno kay Alido apang wala ini sang consistency.

Lakip sa ginpalab-ot nga concern sang CLIAJODA ang pagpauntat sa transloading sang mga pasahero sa perimeter terminals ukon pagsaylo halin sa provincial jeepney sa kasubong nga provincial jeepney pakadto sa syudad bisan wala sang car pass , hulamanay sang car pass sang nagkalain lain nga mga banwa sa terminal, pagpauntat sa pagpasakay sang mga provincial jeepneys sang pasahero sa ruta sang city loop, implementasyon sang anti barking ordinance, problema sa trapiko, illegal parking kag iban pa.

Ginpabutyag ni Alido nga samtang indi masolusyunan ang problema, nagapadayon man ang ila pagsakripisyo. (AGB)