(UPDATE) 4 ka empleyado sang Ceres bus nga ginreklamo nagpuli kastigo sa lalaki sa Barotac Viejo, napasakaan na sang kaso

Btac. Viejo, Iloilo–Ginpasakaan na sang kaso ang apat ka mga konduktor sang Ceres bus nga ginatudlo nagpuli kastigo sa 27-anyos nga lalaki sa terminal sa Barotac Viejo.

Suno kay Chief Inspector Joven Arevalo, hepe sang Barotac Viejo Police Station, frustrated murder ang ginpasaka batuk kanday Jimmy Amion, 41 sang Vista Alegre Barotac Viejo; Bernard Britaña, 28 sang Bariga, Banate; Jolan Aguirre, 35 sang La Fortuna, Btac. Viejo kag ang at large nga si Peter John Lagamon.

Kritikal naman sa ospital ang biktima nga si John Mark Balquin sang Poblacion, Barotac Viejo nga may pilas sa ulo.

Sa imbestigasyon sang police, naigo sa semento ang ulo ni Balquin matapos natumba sang ginsipa sang konduktor.

Ginpahayag may away nga natabu sa tunga sang biktima upod sa iya tatlo ka mga abyan kag sa mga konduktor. (AGB)