Negosyante sa City Proper, ginserbihan sang search warrant bangud sa illegal possession of firearms; subject, gin-angut sang police kay the late PDEA identified drug group leader Melvin Odicta kag nagapangatubang man sang kaso nga grave threats, abduction kag rape sa menor-de-edad

Iloilo City — Ginserbihan sang search warrant sa kaso nga illegal possession of firearm ang negosyante nga si Hamza Kayani sang Tanza Esperanza, City Proper kaina sang aga, Agosto 23.

Pila sa narecover sang mga katapu sang Police Station 1 kag Explosive and Ordnance Division sang Iloilo Ccity Police Office sa balay ni Kayani ang isa ka rifle grenade, duha ka magazine sang m16 rifle, 45 kalibre nga pusil nga may mga bala, 16 ka sachets sang suspected shabu kag mga drug paraphernalia.

Ginpanghiwala naman ni Kayani nga siya ang nagapanag-iya sang mga recoveries. Handa man ini nga magpaidalum sa drug test agud mapamatud-an nga wala siya nagagamit sang illegal nga druga.

Si Kayani sa madumduman ang involved sa shooting incident sa the Q drive-in motel sa Lapaz sang 2015 kag sang 2016, nadakpan siya sa General Santos City apang na-areglo suno sa iya ang kaso.

Gin-angut naman ni PSUPT Jonathan Pablito, hepe sang Police Station 1, si Kayani kay the late PDEA 6 identified drug group leader Melvin ‘Boyet’ Odicta.

Base sa impormasyon suno kay Pablito, magkaupod sadtu sanday Odicta kag Kayani apang ginpahayag nakastiguhan ang negosyante bangud sang pagtonto sini kay Odicta. Na-areglo man suno sa iya sang duha ang ila gamu kag padayon sa pag-engage sa illegal nga druga si Kayani.

Ginpahayag ni Pablito nga nangin mahinalungon lang si kayani sa illegal drugs trade kag lunsay mga manggaranon ang iya kliyente.

Ini ang rason kun ngaa nalakip siya sa listahan sang most wanted person sang Police Station 1 kag isa sa mga high value target drug personalities sa syudad.

Liwat nga nagguwa ang pangalan ni Kayani bangud sa reklamo sang pagpamahog, pag-abduct kag pag-rape sang menor-de-edad nga hugot sini nga ginpanghiwala. (AGB)