Security guard, patay matapos nalasakan sang truck sa Jaro; isa pa, pilason; driver sang truck, nagrason nag naglamsot ang iya preno

Iloilo City–Patay ang gwardya nga nalasakan sang truck samtang nagamaneho sang iya motorsiklo sa Buhang, Jaro pasado alas-6 kaina sang aga.

Ginkilala ang napatay kay Armando Flores sang Lambunao nga wasak ang ulo matapos nalasakan sang goma sang truck.

Suno kay SPO3 Richie Dequito sang Jaro Police Station, naglamsot ang preno sang truck nga ginamaneho ni Michael Rebojo sang Quinagaringan Pequeño, Passi City kag nadulaan ini sang kontrol gani nadiretsuhan ang biktima.

Pilason naman si Richard Loterono sang Badiang, New Lucena nga may pilas sa tuo nga tiil matapos nga ginyudyod man ang iya ginamaneho nga motorsiklo.

Preso ang driver sang truck sa Jaro Police Station kag pasakaan sang kaso nga reckless imprudence resulting to homicide, physical injury and damage to property.

Gin-ako ni Rebojo nga may mga tiun nga nagakalamsot ang preno sang truck nga iya ginamaneho ilabe pa kon malawig ang iya byahe apang gindepensa sini nga mahinay lang ang iya dalagan sang natabu ang aksidente kaina sang aga. (AGB)