DALAGITA NGA GINTIRO-PATAY SANG IYA STEPFATHER SA MAASIN, MASAMI NGA GINASAKIT SANG SUSPECT SUNO SA IYA CLASSMATE

Masami nga ginasakit sang iya stepfather si alyas Faye nga iya natiruhan sa barangay Buntalan, Maasin kagab-i.

Ini ang pahayag ni alyas inday, classmate ni Faye bangud nagapanugid suno sa iya ang biktima nga ginasuluk-sulok siya sang iya stepfather. Over protective suno sa iya ang suspect sa dalagita.

Nagapangakig man suno kay inday ang suspect kon may ka-chat or ka-text ang bktima ilabi pa kon lalaki. Nagapanugid pa si Faye kay Inday nga nagakakibot lang ini nga ginasakit siya sang suspect bisan wala siya sang sala.

Masami man nga ginabukad sang stepfather ang cellphone ni Faye kag nagapangakig kon may password ini. Indi man mahambal ni inday kon nagapangimon ang suspect.

Ginkumpirmar naman ni kagawad Daryll Sabio sang barangay Buntalan Maasin nga masami nagaginamo ang mag live-in partner, matapos nga pila man ka beses nga pag-areglo niya ang mga ini.

Dugang pa ni Sabio, gin-abisuhan na niya ang nanay sang biktima nga maghimo na sang tikang bangud masami sila nga ginapahug paagi sa pagtaya sang pusil .

Ginpahayag man sini nga ginkuha nila bilang barangay tanod ang suspect nga si Jerold Guillermo matapos nga wala na ini sang trabaho.