Official candidates sa local level, wala na-istoryahan sa national assembly sang PDP-Laban suno kay 3rd district of Iloilo Congressman Toto Defensor
Iloilo–Wala naistoryahan sa national assembly sang Partido Demokratiko Pilipino–Lakas ng Bayan ukon PDP-laban kagab-i, Agosto 31, ang mga official candidates sang partido sa local level.
Suno kay 3rd District of Iloilo Congressman Arthur ‘Toto’ Defensor, pagtililipon sang mga lider sang partido kag elective officials ang natabu.
Katuyuan sini nga ma-update ang mga nagakalatbu sa partido kag ang sitwasyon sa adbokasiya kag inisyatibo sa federalism.
Lakip na highlight sang aktibidad ang pronouncement ni Presidente Rodrigo Duterte nga suportahan ang kandidatura sang mga miembro sang partido sa masunod nga eleksyon.
Magluwas kay Defensor, nagtambong man sa assembly si Iloilo City Lone District Congressman Jerry Treñas. Una na nagpahibalo si 1st District Congressman Richard Garin nga indi makatambong sa aktibidad. (AGB)