Mga head sang procuring entity, may obligasyon nga maghatag sang detailed engineering investigation sa mga proyekto sa syudad kon mapasar ang proposed ordinance ni Councilor Joshua Alim

Iloilo City — May obligasyon ang mga head sang procuring entity nga maghatag sang kopya sang detalyado nga engineering investigation sang project works nga ginapatuman sa syudad kon mapasar ang proposed ordinance on Anti-delay of Government Project ni Councilor Joshua Alim.

Suno sa konsehal, kon ang proyekto ginapatuman sang regional office, ang Department of Public Works and Highways (DPWH 6) ang iga-require nga maghatag sang detailed engineering investigation.

Kon sa syudad ginapatuman ang proyekto, ang city district engineering office ang magahatag sang kopya.

Magluwas sa detalyado nga engineering investigation, gina-require man ang paghatag sang survey and designs, qualifications kag kapasidad sang nagpasakop nga contractor sa ipatuman nga government projects.

Ginbasehan ni Alim sa iya ordinansa ang Government Procurement Reform Act nga nagamandu nga wala sang himoon nga pag-award ukon bidding sang proyekto kon wala sang detailed engineering investigation.

Isa man ini ka paagi suno sa iya nga pahibaluon ang mga national agencies nga indi magpinagusto sa pagbutang sang proyekto nga wala nakahibalo ang local government unit (LGU).

Base sa proposed ordinance, magatukod sang oversight commitee si Mayor Joe Espinosa paagi sa Executive Order nga amu ang magamonitor sang progress kag development sang proyekto.

Ang committee amu ang magarekomendar sa City Legal Office sa pag-file sang kaso kon mapamatud-an nga naglapas sa ordinansa ang head sang procuring entity kag ang contractor. (JoMaque)