Councilor Plaridel Nava, gin-akusahan si Mr. Melchor Tan nga naga-lobby agud indi pagsuportahan ang imbestigasyon sa pag-tap sang opisina ni Cong. Treñas sa linya sang koryente sang syudad; Tan, nagpanghiwala sa akusasyon

Iloilo City — Gin-akusahan ni Councilor Plaridel Nava si Mr. Melchor Tan nga naga-lobby agud indi madayon ang iya pag-imbestigar sa ginpahayag pag-tap sang opisina ni Congressman Jerry Treñas sa linya sang koryente sang City Agriculture’s Office.

Suno kay Nava, may nagsugid sa iya nga isa ka konsehal nga gintawgan sila ni Tan kag gin-engganyo nga indi pagsuportahan ang iya resolution.

Ginapanindugan naman ni Nava nga dayunon niya ang iya privilige speech sa masunod nga semana bangud illegal ang ginahimo sang congressional office.

Dire suno sa iya matakos ang interest sang mga konsehal sa iya ipasar nga resolution kon bala para sila sa kaayuhan sang mga pumuluyo ukon sa interest sang isa ka politiko.

Ginpahayag sang konsehal nga indi dapat pagpunggan sang kampo ni Treñas ang imbestigasyon kon wala man ini sang may ginatago kag indi niya kinahanglan nga diktahan ang mga konsehal.

Maathag nga violation sa laye ang ginahimo sang opisina ni Treñas bangud nakarehistro sa City Agriculture’s Office ang kuntador kag city government ang nagabayad.

Ginkuwestyun man sini kon diin nagakadtu ang pundo sang kongresista para sa konsumo sa koryente sang iya opisina.

Ginpanghiwala naman ni Tan ang akusasyon sa iya ni Nava kag ginpanindugan nga wala siya nakatawag sa mga konsehal. (JoMaque)