READ: Press release sang 61st IB, PA sa engkuwentro sa tunga sang mga suldado kag NPA sa Leon
61ST IB KAG MGA TERORISTA NGA CPP-NPA, NAG-ENGKWENTRUHANAY SA LEON
LEON, Iloilo – Nakaengkwentro sang tropa sang 61st Infantry (Hunter) Battalion ang mga ilisipon nalang nga miyembro sang terorista nga CPP-NPA sa Sitio Ali, Barangay Malublub, Leon, Iloilo kaina sang kaagahon. Nagapatigayon sang security patrol ang tropa sang 61IB sang maka-engkwentro sang mga ini ang kapin pulo (10) ka mga terorista.
Naglawig sang kapin kinse (15) minutos ang nasambit nga engkwentro tub-tob nga nagpalagyo ang mga terorista sa direksyon padulong sa Bgry. Gines sa amo man nga banwa. Wala sang may napilasan sa bahin sang gobyerno samtang wala pa natumod ang sa bahin sang kaaway.
Ang nasambit nga engkwentro resulta sang wala untat nga paglagas sang tropa sang gobyerno sa mga terorista nga nag-ambush sa mga inosente nga sibilyan sa banwa sang Igbaras sang damlag lang nga nagresulta sa pagkapilas sang babaye nga empleyado sang Century Peak Energy Corporation (CPEC).
Madumduman nga ginpahayag ni Colonel Benedict Arevalo, Commander sang 301st Infantry Brigade nga indi na dapat pa paghulaton nga magsabwag sang kalakasan ang terorista nga grupo batuk sa katawhan.
Kag ginpasalig man sini nga indi sila mag-untat sa paglagas sa mga terorista. Ini ang ika-7 na nga engkwentro sang tropa sang gobyerno kag sang terorista nga grupo umpisa nga Hulyo 21 kadungan sa pagpabaskog sang puwersa sang gobyerno sang ila operasyon sa pagtapna sang pagpangilkil sang terorista nga CPP-NPA.
Nagpanawagan man si Col Arevalo sa katawhan sa Panay nga padayunon ang pagkooperar sa Army kag PNP kag i-report ang ano man nga hulag kag aktibidad sang mga terorista nga CPP-NPA agud matapna ang ila kapintas.
Para sa ano man nga impormasyon bahin sa hulag kag mga aktibidad sang CPP-NPA Terrorist, mahimo kamo nga magtawag ukon mag-text sa masunod nga mga numero: 0928-175-7208 para sa Smart kag TNT users; 0916-766-3740 para Globe kag TM subscribers. (JoMaque)