Food district sa Tabuc Suba, Jaro, ginreklamo sang mga residente sang tupad nga subdivision
Jaro, Iloilo City – Gin-ako ni Tabuc Suba Punong Barangay Joel Jabonillo nga nakalab-ut na sa iya ang reklamo sang mga naga-istar sa Villa Lizares Subdivision batuk sa Garaje Food District.
Ginareklamo sang mga residente ang ginpahayag nga pag-double park sa ila road right of way sang mga customers sang food district gani mabudlay para sa ila ang pagsulod kag paguwa sa subdivision. Ang right of way ara sa kilid sang food district.
Suno kay Kapitan Jabonillo, makapila ka beses siya nagtalana sang skedyul agud mag-istoryahanay ang mga complainants kag tag-iya sang food district apang wala nagakadayon. Nagpasalig man suno kay Jabonillo ang tag-iya sang food district nga siya na lang ang ma-istorya sa mga nagareklamo kag nagdumdom ang punong barangay nga nasolbar na ang problema.
Nagpasalig si Jabonillo nga aksyonan ang problema matapos nga liwat nagtuhaw. Gin-ako sang punong barangay nga wala naka-agi sa public hearing ang pagpatindog sang food district pero ginrason nga may permit ang tag-iya halin sa syudad agud magsugod sa pag-operate. (JoMaque)