(UPDATE) Driver sang Ceres bus nga nadalahig sa aksidente sa Dumangas sa diin 1 ang patay kag 1 ang pilason, ginhilway sang police

Dumangas, Iloilo–Gin-release sang police ang driver sang Ceres bus nga involved sa aksidente sa Barangay Balabag sa amo nga banwa kahapon, Setyembre 26.

Suno kay SPO3 Roger Parcon, imbestigador sang Dumangas MPS, pasado alas-5 kaina sang kaagahon sang ginbuy-an nila si Romel Bansales sang Barotac Viejo matapos nag-expire ang iya detention period.

Ginpa-athag ni Parcon sa bata sang retired nga katapo sang air force nga napatay sa aksidente nga kinahanglan nila nga buy-an ang driver pagkatapos sang 18 oras nga wala sang may gin-file nga kaso. Pwede pa man suno sa pulis makapasaka sang kaso ang pamilya sa driver paagi sa regular filing.

Base sa kuha sang dash cam sang Ceres bus, nag-lapaw sa lane sini ang Toyota Revo nga ginamaneho ni Remigio Inventor, 80 anyos, gani nakabunggo sa bus. Patay si Remigio samtang padayon nga ginabulong sa ospital ang iya asawa nga si Cerdy, 72. Residente ang mag-asawa sang Bulaqueña, Estancia. (AGB)