4 ka pamilya, ginapa-evacuate kasunod sang pag-usmod kag paglitik sang duta sa nabukid nga porsyon sang Barangay Carit-an, Patnongon, Antique

Patnongon, Antique (UPDATE) – Idumili na ang pagpuyo sa porsyon sang Brgy. Carit-an nga apektado sang pag-usmod kag paglitik sang duta.

Ini ang rekomendasyon sang composite team sang DENR sa Antique Provincial Environment and Natural Resources Office matapos ang inspection sa lugar.

Suno kay Antique PENR officer Andre Untal, gin-classify na ang lugar nga “very highly susceptible” sa landslides ukon tuman ka dako ang posibilidad nga matabu liwat ang landslide.

Apat ka pamilya ang kinahanglan mag-evacuate suno kay Untal.

Ginapatihan ang mabaskog nga pag-ulan ang gintunaan sang pag-usmod kag paglitik sang duta.

Kinahanglan pa sang dugang nga evaluation agud matul-id ang kabug-usan nga kahalitan suno kay Untal.

Una na ginpahayag ni Patnongon MDRRM Officer Engr. Andres Francis Gideon Esler nga ginabanta lima ka ektarya ang apektado sang pag-usmod kag paglitik sang duta. (JoMaque)