MORE Electric and Power Corporation, nagahulat na lang nga pirmahan ni Pres. Duterte ang ila franchise application

Iloilo City – Nagalaum ang More Electric and Power Corporation nga pirmahan ni Presidente Rodrigo Duterte ang ila franchise para mangin power distribution utility sa Iloilo City.

Suno kay Mr. Jonathan Cabrera, spokesman sang MORE, sang Enero 16 nabaton sang Office of the President ang final version sang Congress para sa franchise sang MORE.

Ginpahibalo ang MORE suno kay Cabrera nga kon kaisa, wala na nagapirma sang franchise ang presidente. Kon matabu ini, paathag ni Cabrera nga maisip sila sang 30 ka adlaw sugod nabaton sang Office of the President ang franchise agud mahimo nga kasuguan.

Matapos ang 30 ka adlaw, masugod naman ang 15 ka adlaw para sa publication.

Subong, Enero 19 nag-expire na ang franchise sang Panay Electric Company ukon PECO. Pero mapadayon sila sa ila operation pinaagi sa gina-uyatan nga Certificate of Public Convenience and Necessity ukon CPCN.

Gin-aku ni Cabrera nga wala pa sang koordinasyon sa tunga sang MORE kag PECO.

Ginpasiguro man niya nga handa na ang MORE para sa power distribution. (JoMaque)