Estudyante sang ISCOF Dumangas, patay matapos ginlampusan sang tubo sang kapareho man nga estudyante sa sulod sang ila campus

Dumangas, Iloilo— Patay ang 23-anyos nga estudyante matapos ginlampusan sang tubo sang kasubong nga estudyante sa Iloilo State College of Fisheries (ISCOF)- Dumangas Campus kahapon sang aga, Marso 11.

Suno kay Chief Inspector Jogen Suegay, hepe sang Dumangas Police Station, gindala pa sa ospital ang biktima nga si Willy Amihoy, 23 anyos, tumandok sang Negros Oriental, apang napatay bangud sang pilas sa ulo.

Suno kay Rex Damian, guard on duty sa eskwelahan, pasado las onse sang aga sang ginpahibalo siya sang personnel sa eskwelahan nga may naga-inaway sa Boy’s Dormitory.

Sang nagresponde sa lugar, nakibot si Damian sang nakita ang biktima nga duguon sa comfort room sang dormitory kag natabunan sang puti nga tela.

Nagpalagyo pa ang suspect nga si Elmer Decilao, 22-anyos sang Barangay Ermita, Dumangas apang nadakpan sang pulis.

Sa imbestigasyon sang pulis, gin-akusaran sang biktima ang suspetsado nga nagkawat sang iya wallet rason posible nahimo ang krimen.

Corps Commander sa ROTC sa ISCOF ang suspect samtang kadete naman ang biktima suno kay Eddie Nilo Empedrado, OIC administrator sa ISCOF.

Nagpamalibad nga magpa-interview ang suspect nga graduating student sa kurso nga Education.

Narecover sa crime scene ang tubo (improvised wasay) nga ginapatihan gingamit sang suspect kag ang tela nga ginapatihan gingamit niya para trapuhan ang mga tinulo sang dugo.

WALA-NAGAHINULSOL

Gin-ako sang suspect ang paghimo sang krimen suno kay Suegay.

Dugang niya, wala man siya nagahinulsol sa paglampos sang tubo sa biktima bangud sang pagpakahuya nga ginhimo sa iya.

DAW INDI MAGPATI

Ginpabutyag sang iloy sang suspect nga si Emily indi siya magpati nga mahimo sang iya bata ang krimen.

Dugang niya, mabuot kag wala siya sang may maisaway sa iya bata.

(JoMaque)