2 drivers sang delivery van, gindakup matapos ginreklamo sa pagpalasik sang mga items

Sta. Barbara, Iloilo — Dakop sa entrapment operation ang duha ka drivers sang delivery van kag ang ila head kagab-i, Marso 20.

Gindakup sa Bangga Dama sanday James Mira sang Dumalag, Capiz kag Paul Christian Escobañez sang Cochero, Molo matapos ginreklamo ni Emerson Mojar, deputy head sang Ninja Van Express Tech Philippines, nga nagapalasik sang mga items nga ginabakal online sa Shopee kag Lazada.

Gindakop man si Jessa Mae Trabuco sang Barangay Pagsangaan, Pavia, head of line sang Ninja Van sa Iloilo matapos nakuhaan sang ginpalasik nga mga items. Ginabanta sa P100,000 nga balor sang cellphone, sapatos kag iban pa nga items ang nakuha sa tatlo.

Halin sa airport sanday Mira kag Escobañez kag gin-intercept sa Bangga Dama samtang na-aresto lang sa follow-up operation si Trabuco.

Disyembre sang nagligad nga tuig, ginabanta sa 15 milyones pesos ang nadula sa Ninja Van sa bug-os nga pungsod bangud sa gin-report nga pagpalasik sang mga items. (AGB/NM)