Lalaki nga namiesta, ginkastigo-patay sa Janiuay

Janiuay — Patay ang 55-anyos nga lalaki nga ginkastigo sang nagpamiesta sa Barangay Yabon sang Abril 25.

Suno kay Police Staff Sergeant Mary Jean Calimutan, imbestigador sang Janiuay Police Station, gindala pa sa ospital ang biktima nga si Juan Galan, pumuluyo sang Barangay Kuyot, Janiuay, apang napatay.

Natalana ipa-autopsy ang bangkay ni Galan apang base sa inisyal nga impormasyon suno kay Calimutan, may pilas ang biktima sa tuo nga bahin sang iya dughan kag sa agtang bangud sang posible pagpanglampos ukon pagsumbag.

Dugang niya, naghanog man ang nagkalain-lain nga parte sang lawas sang biktima.

‘NAGPA-TIYANGGE’

Sa imbestigasyon sang pulis, halin sa baylehan ang biktima kag nagkadto sa tiyangge sa atubang sang basketball court bangud nagapangita sang ilimnon.

Ginpahayag paguwa sang biktima halin sa tiyangge ni Yabon Barangay Kagawad Merlyn Marbebe, nagatumba-tumba na siya rason ginrespondehan sang bata sang barangay official kag gindala sa ospital.

Nagapati ang pulis nga sa tiyangge nagluntad ang krimen bangud wala sang komosyon ukon nakabais si Galan sa baylehan.

Nagapadayon ang imbestigasyon sang pulis sa identity sang suspetsado.

‘NAGASALIGMATO ANG PAHAYAG’

Nagasaligmato naman ang pahayag sang mga yara sa tiyangge sang nagluntad ang insidente.

Suno kay Calimutan, may mga nagpahayag nga nakasulod sa tiyangge ang biktima apang may yara man nga nagapanindugan nga wala nakakadto si Galan.

Ginpahayag naman sang pamilya Marbebe nga wala gintandog sang ila bisita si Galan.

Ginkunfirmar sang pulis nga may naga-inom malapit sa tiyangge sang nagsulod ang biktima.

Ginatinguhaan pa sang Aksyon Radyo Iloilo nga makuhaan sang statement ang pamilya Marbebe angut sa insidente. (JoMaque)