Anakbayan-Panay, nanginwala nga konektado ang grupo sa NPA

By: Aine Grace Bravo | August 17, 2019

Iloilo City —

Iloilo City — Gin-ako sang grupo nga Anakbayan nga nagapang-recruit sila sang mga miembro pareho man sang ginahimo sang iban nga organisasyon sa sulod sang eskuwelahan suno kay Anakbayan-Panay Deputy Spokesperson Mr. Justin Loise Madriaga.

Pahayag ini ni Madriaga kasunod sang Senate hearing nga ginapamunuan ni Senator Ronald Dela Rosa sang nagligad nga semana angut sa mga na-missing nga mga estudyante matapos ginpahayag nag-upod sa grupo.

Suno kay Madriaga, target sang grupo nga mangin member ang mga pamatan-on nga naga-edad sang 13 tubtub 35 anyos.

Ang ila mga miembro suno sa iya ang ginapaidalum sa orientation sa diin ginapakilala ang organisasyon, mga katuyuan kag mga aktibidad sini.

Wala suno sa iya sang kamatuoran ang mga alegasyon sang kapulisan nga ginahatagan nila sang kuwarta ang mga recruits.

Gin-athag ni Madriaga nga non-profit ang ila grupo kag wala sila nagapangolekta sang kuwarta kun wala man sang mga proyekto.

Nagahatag sang suporta pinansyal ang mga miembro agud makahimo sang mga aktibidad ang grupo sa sulod sang eskuwelahan.

Paagi ini sa ginahatag nga membership fee kada bulan sang mga miembro suno kay Madriaga.

INDI KONEKTADO SA NPA

Ginpanghiwala ni Madriaga nga konektado sila sa New People’s Army (NPA).

Gin-athag niya nga legal ang ila organisasyon kag naga-aksyon sila kon may makita nga sala sa gobierno.

Delikado suno sa iya ang ila kabuhi kon ma-tag sila nga mga rebelde.

Gintumod niya ang mga indibidwal nga naangut sa NPA nga ginapamatay bisan wala man sang pamatuod nga miembro sila sang amu nga grupo.