33 pulis sa Western Visayas nga yara sa narco list sang Directorate for Intelligence, pagahatagan sang tiun nga ma-clear ang ila ngalan

By: JoMaque | September 19, 2019, 10:20am

Iloilo — Nag-umpisa na ang adjudication process sang Regional Adjudication Board sa 33 ka pulis sa Western Visayas nga yara sa listahan sang Directorate for Intelligence nga ginapatihan may kahilabtanan sa illegal nga druga.

Suno kay Police Regional Office Director Brig. General Rene Pamuspusan, katuyuan sang nasambit nga proseso nga ma-clear ang mga pulis nga yara sa listahan nga wala man sang kahilabtanan sa illegal nga druga.

Apang ginklaro sang opisyal nga PNP National Headquarters lang ang may gahum sa pag-clear sang mga pulis nga yara sa narco list.

Sa adjudication process, pagabasehan sang Regional Adjudication Board ang mga impormasyon nga ila nabaton paagi sa Counter Intelligence batuk sa mga pulis nga yara sa listahan.

Pagkatapos nga matipon ang tanan nga impormasyon, iga-validate ini sang board.

Dismissal sa serbisyo ang atubangon sang mga pulis nga mapamatud-an nga may kahilabtanan sa illegal nga druga.