Pag-transport sang processed meat pasulod sa Iloilo province, dapat may shipping permit halin sa Bureau of Animal Industry

By: Aine Grace Bravo | September 21, 2019

via Hotline

Iloilo — Kinahanglan nga mag-secure sang shipping permit halin sa Bureau of Animal Industry ang pag-transport sang processed meat pasulod sa Iloilo province.

Base ini sa Administrative Order 8 sang Department of Agriculture kasunod sang pagsulod sang African Swine Fever (ASF) sa pungsod suno kay Dr. Darel Tabuada sang provincial veterinary office.

Kabahin naman sang requirements sa pag-issue sang shipping permit ang license to operate kag certification of product registration halin sa Food and Drug Administration.

Ginpahayag ni Tabuada nga kon ma-intercept sang veterinary quarantine sa checkpoint ang gina-transport nga processed meat, pangitaan ang tag-iya sang papeles. Kon wala naman sang mapakita nga papeles sa sulod sang 24-oras, iga-subject sa confiscation kag gub-on ang meat products.

Sa probinsya sang Iloilo, nagtukod sang African Swine Fever Task Force si Gov. Arthur Defensor Jr nga ginabug-usan sang nagkalain-lain nga ahensya. Chairman sang task force ang gobernador kag vice chairman naman ang provincial veterinarian. Katuyuan sini nga matapna ang pagsulod sang ASF sa probinsya paagi sa hugot nga pagbantay sa mga seasports kag airport.