IPPO Director Roland Vilela, nagahimu sang motu propio investigation sa kamatayon sang motorcycle driver nga gintiro sang pulis sa Sara

By: JoMaque | Setyembre 28, 2019, 10:47am

Iloilo — Gina-imbestigaran na ni Iloilo Police Provincial Office Director Colonel Roland Vilela ang pagkapatay ni Adonis Hontiveros Jr sang Pantalan Elizalde, Ajuy matapos gintiro sang pulis sa Zerrudo, Sara sang Lunes sang gab-i.

Automatic suno kay Vilela sa ila operational procedure nga maghimo sang motu propio investigation kon may mapatay sa police operation.

Una na ginpabutyag ni Police Lieutenant Colonel Mario Baquiran, commander sang 2nd Iloilo Provincial Mobile Force Company, nga nagpalagyo sa checkpoint si Hontiveros kag nagpalupok pa sang pusil gani nga gintiro siya sang mga pulis.

Ginapanindugan naman sang duha ka kaupod ni Hontiveros nga wala sang checkpoint sang natabu ang insidente.        

Ginmanduan ni Vilela ang Provincial Investigation and Detective Management Division nga kuhaan sang pahayag sanday Police Corporal John Michael Parcia, Police Corporal Alfredo Bartulo Jr kag Police Patrolman Christopher Paclibar kon ano ang natabu.

Sanday Bartulo kag Parcia ang nag-ako nga nakatiro kay Hontiveros, pero wala nahibaluan kon sin-o sa ila ang nakaigo.

Gin-ako ni Vilela nga isumiter nila ang resulta sang imbestigasyon sa Provincial Internal Affairs Service nga una nag-conduct sang motu propio investigation.