Driver sang salakyan nga nakabunggo-patay sa construction worker sa Oton, madugay na nga wala nagapauli sa Dumangas

By: JoMaque | Disyembre 10, 2019, 8:40am

Dumangas, Iloilo–Madugay na nga wala nagapauli sa Capaliz, Dumangas ang driver sang salakyan nga nakabunggo-patay sa construction worker sa Pulo Maestra Vita, Oton sang Disyembre 3 nga si Jessie Bagaan.

Suno kay Kagawad Norberto Diaz Jr., madugay na niya nga wala nakita sa barangay si Bagaan. Sa iya pagkahibalo, wala na nagatiner pa sa ila barangay si Bagaan kag nagabisita na lang sa lugar.

Ginkumpirmar man sang asawa ni Bagaan nga mga lima na ka tuig nga wala nagatiner sa ila balay ang iya bana.

Nagakadto lang suno sa iya sa ila balay si Jessie kun magdul-ong sang sustento sa ila kabataan bangud wala na sila naga-upod nga duha.

Wala na nagpa-record sang interview ang asawa ni Jessie bangud indi na niya luyag pa nga maulamid sa problema sang iya nga bana.

May kabataan sila suno sa iya nga indi na niya luyag pa maapektuhan.
Ginakabalak-an niya nga i-bully sa eskwelahan ang ila kabataan.

Luyag athagon sang asawa ni Bagaan nga wala na nagapauli sa ila balay sa Dumangas ang iya bana bangud ginakulbaan siya nga balikan sang pamilya sang na-agrabyo sang iya nga bana.