Security guard, gintiro patay sa Pavia; suspek nga naka-motorsiklo, wala pa makilala

By: Aine Grace Bravo | December 24, 2019

via Francisco Enar

Pavia, Iloilo — Dead-on-arrival sa Western Visayas Medical Center ang security guard nga si Martin Alvarez IV, tumandok sang Dumarao, Capiz matapos gintiro sa Brgy. Balabag, Pavia las 7:30 kaina sang aga.

Gindeklarar nga napatay si Alvarez las 8:10 sang aga bangud sang pilas sa ulo kag lawas.

Apat ka lupok ang nabatian sang mga residente sa Barangay Balabag, Pavia.

Nagahuray-ad na ang lalaki sa karsada sang nakit-an sang mga residente.

Ang biktima naga-renta sa boarding house sa Balabag.

Sakay sa motorsiklo si Alvarez sang gintiro.

Security guard sa Parc Regency ang biktima.

Ginpahayag nga nagabantay na ang suspek kag gintiro ang biktima sang naglabay.

Suno sa nakakita, nakasuksok man sang blue nga pantalon, t-shirt nga puti kag itom nga jacket ang suspek nga sakay man sa motorsiklo sang nagpalagyo.