Pavia police, may suspek na sa pagtiro-patay sa security guard

By: JoMaque | Disyembre 25, 2019, 12:25pm

Iloilo — (UPDATE) May mga suspek na ang Pavia police sa nagtiro-patay kay security guard Martin Alvarez IV, 31 anyos sang Capiz pero assign sa Parc Regency Subdivision sa Pavia.

Suno kay Police Major Jojo Tabaloc, hepe sang Pavia Police Station, nakakuha sila sang CCTV footage sa mga lugar nga ginlabayan sang riding-in-tandem nga suspek gani na-establisar ang ila identity.

Pero nagbalibad si Tabaloc nga maghatag sang dugang nga detalye bangud padayon ang hot pursuit operation.

Nagamaneho sang motorsiklo si Alvarez kag pauli sa iya boarding house sa NIA Road sa Barangay Balabag, Pavia sang gintiro kahapon sang aga, Disyembre 24.        

Gindala pa sa ospital si Alvarez pero gindeklarar nga dead-on-arrival bangud sang mga pilas sa ulo kag lawas.